واحد من اصعب الاشياء اللي يخلي ناس كثير يترددون يبدون قنواتهم على اليوتيوب هو التحدث قدام الكاميرا

وهو صحيح فعلاً التحدث للكاميرا شيء غريب كون انك ما تتحدث ما شخص ويتفاعل معك

طيب خلونا اليوم نتكلم نصائح بإذن الله بتخليك تتكلم قدام الكاميرا بشكل مريح جداً ويصبح امر روتيني

انا لا زلت اتذكر اول مره قررت اصير قدام الكاميرا بدال ما كنت خلف الكاميرا لمدة طويله من الزمن ، بالرغم اني كنت مجهز كل كلمه بقوله بسكربت وحاطه قدامي تحت الكاميرا لكن كنت اتلخبط واضيع الكلام اللي بقوله كأني اول مره اقراه رغم اني انا اللي كاتب السكربت

تجربة اليوتيوب

تجربة اليوتيوب عظيمة جداً بالنسبه لي .. لاني كتبت هالمقال ما سويت تقريباً ٧٠ فيديو على قناتي باليوتيوب ومن هالتجربه بقولكم نصائح ساعدتني جداً بالتحدث امام الكاميرا بشكل طبيعي جداً

اولاً : تكلم عن موضوع تحب تتكلم عنه قدام اهلك اصحابك

اكيد فيه موضوع جاء في بالك ! مثلا مثلا انا اللحين اقدر اتكلم عن المونتاج على برنامج الفاينل كت برو او كاميرات السوني او نصائح لتصوير الفيديو بشكل طبيعي جدا واقدر ايضاً ابحر في الموضوع بسبب حبي وشغفي للشيء هذا

وبالتالي وقت ما اتكلم قدام الكاميرا بصير اقدر اقول اشياء ما كتبتها في السكربت بكل اريحيه كأني اسولف على احد من اصحابي

المهم تكلم عن شيء انت تحبه

ثانياً : تخيل ان الكاميرا واحد من اخوياك

ليش تتخيل ان الكاميرا واحد من اخوياك ؟ لانه فعلا التحدث لجماد (الكاميرا) امر غريب لانك تتكلم ومافيه ردة فعل وفعلا ببداياتي على اليوتيوب كنت اتلخبط واحس اني قاعد اسوي شيء خطأ

لكن مع الممارسه وكثرة التصوير صرت اتخيل الكاميرا شخص وانا اتكلم له بحيث احاول ما احس اني اتكلم لجماد

ثالثاً : شتت انتباه المشاهد وانت تتكلم

هذي النقطه صراحه ما تنشرح كتابياً .. شرحتها نظرياً بالفيديو

وخلاصتها انك تخلي المشاهد ينتبه لشيء بحيث يخف التركيز عليك ولو صار فيها اخطاء بكلامك ما راح ينتبه

تابع الدقيقه ٣:٥١ بالفيديو المرفق تحت

( غالباً في الفلوقات )

رابعاً : اختيار المكان المناسب للتصوير

تخيل انك تصور في مطار وفيه ٤٠ شخص عالاقل على جوالاتهم وينتظرون رحلاتهم .. اول ما تفتح الكاميرا وتبدأ تتكلم الكل راح يشوفك وما تنلام ابداً لو توترت بتحس شكلك غريب جداً وهذا اللي بيحس به اغلب الناس

تقدر تعوضه بلقطات بي رول وبعدين تضيف فويس اوفر لنفس اللقطات وتصير تكلمت عن اللي تبي بدون ما تحرج نفسك

الا اذا كان بالنسبه لك عادي ما يسبب احراج انسى الكلام اللي فوق

لذلك مهم اختيار المكان اثناء التصوير

خامساً : اضغط زر التسجيل ولا يوقفك شيء

احياناً تتوتر قبل تضغط زر التسجيل وتحس بالضياع قبل تصور نفسك وانت تتكلم ، انا اقول اضغط زر التسجيل ولا يوقفك شيء لان كل اللقطات اللي تصور حتى لو قلت شيء ما تحب تنشره للجمهور بالنهاية الفيدوهات هذي راح تتمنتج ومحد راح يشوف شيء انت ما قررت انه ينشر

لذلك لا تفكر بالفيديوهات اللي تصورها مهما كانت لان الفيديو النهائي انت بتقرره بالنهايه

لذلك صور ولا يهمك شيء بالنهايه هو فيديو ما جاز لك تقدر تعيده وتصور احسن من الاول

اخيراً

مهارة التحدث امام الكاميرا مهارة تحتاج وقت

لا تتوقع انه من اول ما تفتح الكاميرا وتجلس تتكلم قدامها راح تتكلم طبيعي ١٠٠٪ ، بالرغم انه فيه ناس كثير يولدون متحدثين جرئين لكن الاغلب قد يواجه مشكلة الارتباك وهذا طبيعي جداً

لذلك احب اقولك انها مهارة تحتاج ممارسه ومع كل فيديو تصوره وانت تتكلم للكاميرا بتلاحظ تحسن جيد في كونك طبيعي قدام الكاميرا

الخبرة والممارسه دائماً تصنع الفرق

وهنا الفيديو على قناتي تكلمت فيه كل ما تم ذكره بشكل نظري اذا مالك خلق تقرأ

اتمنى لكم التوفيق دائماً يا اصحاب